Алматыда Сапарғали Бегалиннің 130 жылдығына орай оның еңбегі туралы айтылды
Алматы қаласының Өңірлік коммуникациялар қызметінің алаңында белгілі балалар жазушысы, фольклорист және қоғам қайраткері Сапарғали Ысқақұлы Бегалиннің туғанына 130 жыл толуына арналған брифинг өтті. Іс-шараға жазушының немересі Гүлнар Бегалина, сондай-ақ С. Бегалин атындағы Орталық қалалық балалар кітапханасының басшысы Алма Қонарова қатысты.
Брифингте сөз сөйлеген Гүлнар Хамитқызы Бегалиннің тұлғасы қазақ әдебиеті мен ХХ ғасыр мәдениеті тарихында ерекше орын алатынын атап өтті.
«Біздің отбасымыз үшін ол – тек жазушы және ғалым ғана емес, сонымен қатар дана, мейірімді Сапеке-ата. Ол ең қиын жылдары да ішкі жарығын сақтай білді», – деді ол.
Спикер Сапарғали Бегалиннің жастық шағынан білімге және рухани дамуға ұмтылғанын айрықша атап өтті. Ол қазақ зиялыларының ірі тұлғалары – Мұхтар Әуезовпен, Қаныш Сәтбаевпен, Әлкей Марғұланмен тығыз қарым-қатынаста болған.
Гүлнар Бегалина атасы туралы айта отырып, жазушыны замандастарының жоғары бағалағанын да еске салды.
«Мұхтар Әуезов: «Сапекең бұлақ суындай таза. Ол – біздің мәдениетіміздің ар-ожданы», – дейтін. Бұл сөздер оның мінезінің шынайы көрінісі», – деп бөлісті ол.
Оның айтуынша, жазушы өмірінің көп бөлігін фольклорды зерттеуге, халық әндерін, аңыздарын, дастандарын жинауға, ауызша мұраны сақтауға арнаған. Оның 1946 жылы жазылған «Жамбыл» кітабы 50 жылдан кейін жарық көрген.
С. Бегалин атындағы Орталық қалалық балалар кітапханасының басшысы Алма Қонарова мерейтойға орай ұйымдастырылатын мәдени бастамалар туралы ақпаратпен бөлісті. Ол кітапханада жазушының шығармашылығын насихаттау бойынша ауқымды жұмыстар басталғанын атап өтті.
«Сапарғали Бегалиннің 130 жылдығына орай біз көрмелер, әдеби сағаттар және тақырыптық кездесулер сериясын дайындадық. Біз үшін балаларға автордың кітаптарын ғана емес, сонымен қатар оның өмір сүрген және шығармашылық еткен дәуірінің контекстін көрсету маңызды», – деп хабарлады ол.
Спикердің айтуынша, кітапхана қорында Бегалиннің өміріне қатысты сирек басылымдар, қолжазбалар және архивтік фотосуреттер бар.
«Біз тек әдеби мұраны ғана емес, сонымен бірге оның ғылыми, фольклорлық қызметін де көрсететін материалдарды жинауға тырыстық. Заманауи оқырмандар үшін бұл жазушымен тереңірек танысудың бірегей мүмкіндігі», – деп қосты ол.
Сондай-ақ жыл бойы балалар жазушыларымен және әдебиет зерттеушілерімен кездесулер, мектептер мен кітапханаларда Бегалиннің шығармаларын оқу, оқушыларға арналған интерактивті іс-шаралар және автордың өмірі туралы тақырыптық жинақтар мен материалдардың тұсаукесерлері жоспарланған.
Брифингті аяқтай келе, қатысушылар Сапарғали Бегалиннің мұрасы бүгінгі күні де өзекті болып қала беретінін атап өтті, өйткені оның шығармалары адалдық, еңбексүйгіштік, адамдарды құрметтеу және өз еліне деген сүйіспеншілік туралы түсінік қалыптастырады.
