Алматыда жұмысшы мамандықтарының маңыздылығы туралы айтылды

30 шілде күні А. П. Чехов атындағы Орталық қалалық кітапханада қалалық өмірдің нағыз қозғалтқыштары туралы көзқарасты өзгертуге ықпал ететін кездесу өтті. «Жұмысшы мамандығы — менің таңдауым» атты шарада Алматыда экран жұлдыздары емес, мегаполистің тұрақты және үздіксіз жұмысын қамтамасыз ететін адамдар — слесарьлар, өрт сөндірушілер, санитарлар, жүргізушілер туралы сөз қозғалды.

Жұмысшы мамандықтар жылы аясында ұйымдастырылған бұл шараға қала жастары мен өз ісінің нағыз мамандары жиналды. Кездесудің мақсаты — жұмысшы мамандықтарының бүгінгі күні тек сұранысқа ие ғана емес, сонымен қатар қоғамның тұрақты дамуының кепілі екенін көрсету. Қатысушылар тек кәсібінің техникалық жағын ғана емес, әрбір мамандықтың артында табандылық, адалдық пен мақтанышқа толы өмірлік оқиға жатқанын айтып берді.

Сахнада сөйлегендердің қатарында танымалдылықпен емес, күнделікті еңбегімен танылған адамдар болды. «Алматы Су» МКК Түрксіб аудандық бөлімінің слесарі Донесбай Аханаев пен №9 троллейбустың жүргізушісі Макпал Қожамсейітова «Ерен еңбегі үшін» белгісімен марапатталған. Олар өз кәсіби жолындағы естеліктерімен бөлісті. №12 өрт сөндіру бөлімінің аға құтқарушысы, азаматтық қорғаныс сержанты Даурен Шерікбай әр минуты біреудің өмірін құтқаруы мүмкін болатын жұмыс күндері жайлы әңгімеледі. Ал Республикалық ғылыми кардиология орталығының санитаркасы Айнагүл Сисенова көп жағдайда көзге көрінбейтін мамандықтардағы мейірім мен жанашырлықтың маңыздылығын еске салды.

Кәдімгі дәрістердің орнына — шынайы әңгімелер. Ұрандардың орнына — ашық әңгіме, жауапкершілік пен өз жұмысыңның қажет екенін сезіну туралы пікір алмасу болды. Жас қатысушылар тыңдап қана қоймай, сұрақ қойып, ой бөлісіп, кәсіби бағыттарын қайта қарастырды.

Алматы қарапайым, бірақ аса маңызды мамандықтардың қадірін түсінуге шақырады. Кітапханада өткен кездесу — соның айқын дәлелі: жұмысшы мамандықтардың тек өткен тарихы ғана емес, жарқын болашағы бар.