Алматы кітап жәрмеңкесінде жаңа басылымдар таныстырылды

Наурыз мерекесіне орай Алматы Кітапханалары Арбатта қала тұрғындары мен қонақтарына арналған кітап жәрмеңкесін ұйымдастырды. Мұнда әркім өзіне қажетті әдебиетті сатып ала алады.

Биылғы жәрмеңкеге Қазақстанның 14 жетекші баспасы қатысып, классикадан бастап заманауи бестселлерлерге, білім, өнер және мәдениет туралы еңбектерге дейінгі кең ауқымды шығармаларды ұсынды. Көпшіліктің назарын IT және жасанды интеллект саласының сарапшысы, журналист Мейіржан Әуелханұлының «Жасанды интеллект әліппесі» атты кітабының таныстырылымы ерекше аударды.

Кітап жәрмеңкесі – тек жеке кітапханаңызды толықтыру мүмкіндігі ғана емес, сонымен қатар мәдени іс-шараның бір бөлшегі болу мүмкіндігі. Келушілер ақын-жазушылардың шығармашылығымен жақынырақ танысып, арнайы ұйымдастырылған әдеби кездесулерге қатыса алады.

«Кітап оқу мәдениеті өмірімізге қайта оралып келеді. Бүгінде кітап нарығының қарқынды дамуын, жаңа баспалардың көбеюін және әсіресе мемлекеттік тілде жарық көретін шығармалардың артуын байқаймыз. Сонымен қатар, әлемдік әдебиет қазақ тіліне белсенді түрде аударылуда, бұл оны еліміздің кең аудиториясына қолжетімді етуде. Қазіргі уақытта күнделікті күйбең тірліктен біраз алыстап, рухани байлыққа көңіл бөлу маңызды», – деді республикалық «Ақжелкен» журналының бас редакторы Есей Жеңісұлы